Status Updates From أحمد سماعين: سيرة إنسان

روّح يا حمد ..
الدمعة فرت من عينك وشافوها الناس.
طول عمر عينيك يا احمد سماعين
ما كانت فناجين للدمع
على آخر الدنيا بتبكي كده؟
وف وسط الجمع؟

فاكر سماعين...
فاكره بعوده الملّوي في البفتة الخام
وعينيه اللي الدمعة فضلت فيها وما نزلتش
لحد ما مات.
يمسح عرقه ف كُمه
ويملأ (المِخول) تبن
ويكلم بقر العمدة..كأنه ناس
اللي ما فاكره مرة ضحك
اللي ما فاكرة مرة قميصة كان مغسول
كان طول اليوم يمشي في المِخول
ومن المِخول للبيت
حافي
حاله في حال نفسه
يفتح في شفايفه ويقفل.

أبنود…
بجميع سواقيها وناسها ونجومها ونسايمها بتكوّع في ساحات الليل
إلا "أحمد سماعين"
مركب أفكار عايمه ف راسه
وعمال تتطوح فيها شمال ويمين
تايه..ومكتِّم على أمر
من سابع دار
تسمع صوت الأفكار
ف دماغ "أحمد سماعين" المِندار
وكإن في راسه حلقة ذكر
أول ليلة،ما تُغمضلُوش عين
الفكرة المجنونة بتجري جوه دماغه زي الوطواط
تطلع…تنزل…تجري…تتكعبل
تلزق في سقف الراس..
ولما يحس بإنه خلاص ارتاح وعينيه تغْفِل
يفلت ويحوم من تاني الوطواط.