Ghadah Algarni > Recent Status Updates

فيه شئ صار مو منطقي؛ فيه حدث صار والبطلة كان تقدر تستفسر عنه! ليش ما راحت؟ هذي الاشياء البسيطة والغير منطقية ما تعجبني لان بالاخير مهما كانت البطلة هادئه وخجوله ما يوصل انها ما تسعى لمعرفة شئ مهم زي كذاا

قبل ابدأ الكتاب كنت رايحه جرير وفجاءه (على اني اشوف الكتاب من زمان) بس حسيت ذكرني بكتاب قصر الورق. الحمدلله طلع افضل بكثيررر من قصر الورق وفعلا فيه تشابهه بينهم بس هذا مرتب اكثر وواضح اكثر وتسلسل الاحداث جدا ممتاز وحتى اقل استفزازز بكثير وطبيعي. ان شاء الله اخلصه بس مشكلته تفاصيل كثيرة احس اني جالسة اطفش واطول لين ابدأ فصل جديد لكن اليوم حاولت اسمعه صوتي بسرعه 0.9 ممكن يخليني ذا الشئ اركز واكمله صوتي اسرع لي.

ايشششششششششششششششششششش!!!!! كل شئ كنت متوقعته الا هذااااااااا!!!!! توني امس اقول إنه غالبا كتب الغموض والجرائم الي بطلاتها نساء تنتهي بنهاية متوقعةةة فكنت شاكه طول الوقت هل بتسوي كالمعتاد لان ذي اول رواية اقراها لماكفادن ولكن سوت شئ مجنون ما توقعته كذااا
حتى لما قريت اخر سطر رجعت اقراه مره ثانيه اقول ما فهمت وش السالفه بعدين استوعبت 😭🙉

اخخ الحين فهمت وصف الأجانب لروايات فريدا ماكفادن!!
كلهم يقولون ودك تخلص الكتاب بجلسة وحده من الحماس والاثارة وفعليا ذا للي يصير معي لاني نادر ألقى كتاب اقرأ فيه بكمية كبيرة بشكل متواصل بدون ما اطفش واقفل الكتاب.
عموما يارب تكون النهايه مختلفه عن المعتاد في روايات الغموض؛ لانه طفشت ألقى نفس النهايات!! بس حاليا فيه علامات تقول لاا الوضع مختلف وبنفس الوقت ما انكشف لنا الغموض وراء احدى الشخصيات الاساسيه بالرواية

واوو من زماااان عن تضنيف الرعب وبالنسبه لي تصنيف الرعب والكوميديا هم اصعبببب تصنيفين على انه الغالبية ممكن يشوفونها الاسهل بس العكس تماما فهي الاصعب!! فصعب تخلي القارئ يضحك لانه الناس أصناف وبنفس الوقت صعب تخوفه بس ممكن تسبب له قلق وتوتر بسهوله لكذا تلقى روايات الغموض هي الاكثر انتشارا. عموما الوصف مرعب والمكان ارعبني وذكاء البطلة عجبني ما احب الغبيات بالرعب🤣 يستفزوني. بداية موفقه

لازم اتكلم عن هذي النقطة ضروري وهي إن وش دار النشر هذي إلي اول مره اسمع فيها والمترجم هو احمد كريم وبرضوا اول مره اسمع فيه مع ذلك الترجمة ممتازة جدا!! ✨️ ياليت والله يمسكون روايات وكتب ثانيه ويترجمونها لان ما مرت علي اغلاط املائيه زي بعض دور النشر الي بعضها معروفه وبعضها جديدة واشتهرت مع ذلك لا تخلوا من الاخطاء بينما هنا الشغل نظيف بصراحه😍 اتمنى صدق يستمرونننن

مبدئياً... عجبتني مررره 😍

لا بأس بس للحين مو واضح لي وش سالفة الرواية وخيالها غريب لانه بدأ فجاءه وما ادري هي هل فعلا خياليه اصلا!

اممم كمقدمه القصة صدمتني ما توقعت كذا توقعت شئ افضل بس ان شاء الله الاحداث الباقيه احلى.
لغتها سهله مقارنة بباقي الروايات.

ياربي سترك مبدئيا حلوةة بس ذكرتني برواية قصر الورق 😵‍💫
رواية قصر الورق اشتهرت عند الاجانب ولقت سب او اعجاب وانا سبيتها 🤣 لانها ما عجبتني ابدا وسحبت عليها حتى! وفوق كذا كانت فوضويه والخ ولكن هذي مرتبه وواضحه اكثرر وبدايتها شيقه بس اول ما شفت وصف الطبيعة والمكان وكذا الجو عاام للرواية هذي تذكرت علطول رواية قصر الورق!! بس اعتقد هذي بتكون نسخة افضل بكثير ان شاء الله ✨️

كل مره يزيد اعجابي بالرواية وياليت يغيرون غلافها!!
فعليا لما شريتها توقعت إنه يوجه رسائل للضائعين مثل حالتي 😂 ولكن قرته اختي وعلمتني انها رواية وتوني اقراها بعد كم سنه! فعليا جميله الرواية وعميقه المحادثات ومسليه كقصه واحداث وحتى كل شخصيه نتعمق بقصتها. بس لو لاحظتوا بتشوفون كيف كانت دور النشر تسوي اغلفه تناسب القراء زمان الي غالبيتهم كانوا يكرهون الروايات 🤡 الحمدلله انه تغير الوضع

مبدئيا ذكرني برواية Hate Mail اللهم إن هذي فيها عمق اكبر ومشاعر اكثر. حبيتها جدا جدا وانا اوني في بدايتها متحمسه افضى واكملها.

يا ساتر هذا كتاب فسق وفسوق مو رواية 😂 كل انواع البلاوي في الكتاب! معقوله كذا كتب نجيب محفوظ! ان شاء الله اقرأ كتاب ثاني وتكون تجربة افضل. عموما بخلص الكتاب قريبا وما اعتقد اعطيه تقييم متوسط حتى. صحيح فيه احداث بس ما فيه قصة. والحبكه مضروبه شوي. وكمان ما عجبتني الحقبه الزمنيه. وايضا ممكن مثل تعليقات البعض نجيب يتكلم عن عدم اهتمام الشعب في وقت الحرب حيث كان مشغولين باللهو واللعب وام كلثوم فكيف يأتي النصر

الى الآن الرواية فيها كم error، ما يهم اذا الكاتب نجيب محفوظ المهم تكون الحبكة متقنه قدر الامكان ومنطقيه لانه صار كم شئ اشوفه غبي وغير منطقي بصراحة. برضوا عادة ما تهمني ذي الامور بس الجنس مذكور بكثره ووصف النساء كله جنسي! ان شاء الله مو باقي رواياته كذا! بس الغريب اننا نشوف القراء عندنا مدققين عالروايات الاجنبيه وفي الاخير كذا العربية!!😅 تناقض! المشكلة القارئ ممكن لما يقرأ لاجنبي يقول كفار بس ذا وش العذر!

يالطيب وش الي قاعد يصير 🤡
اولللل مره اقرأ لنجيب محفوظ وبصراحه ما راح اكذب واقول إني ما توقعته يكتب كذا! بس انصدمت اني وانا اقرا توقعت حدث معين وشئ معين وصار بشكل صدمني اكثر من الي توقعته 😅 عموما الشئ الوحيد السلبي مره بالروايه هي الحقبة الزمنيه لانه ما تعجبني هذي الحقبه وهي فترة الحرب بين مصر واسرائيل ايام عبدالناصر 😮‍💨

جميلل الكتاب وممتع

خايسس ما فهمت ولا شئ بصراحة! المفروض قبل نبدأ الرواية يشرحون لنا شوي عن عالمهم وعن بعض الكلمات الي ما ادري وش يقصدون بها! بصراحة الرواية ممله مره وبس ودي اخلصها وحتى فوضى

الترجمة لسعيد العظم، مبدئيا ما اعرف المترجم وتوقعت الترجمة بتكون رائعة! توقعت كذا لانها رواية قديمه وترجمت قديما والنسخة الي عندي من 2014! فوق 12 سنة! بس للاسف فقرات كثيرة اعدي عليها ومو فاهمه الوصف، فيه فقرات افهمها وفقرات لا! وفيه كلمات غريبه مدري هو املاءها غلط ولا وش يقصد، احاول ارقع وانا اقرأ وانا برضوا من النوع الي ما امانع مرات تكون الترجمة السيئة لانه توصل الفكرة او اعرف الكلمة وش هي حتى لو الاملاء غلط بس ذا!