Omar

“لو غيتك شهرتك اعمل لها طبال
صوت الكفوف ع الدفوف يدوش لكين قتال
والشهره مهره حويطة تقلب المختال
تجمح وترمح وتقزح باللي راكبها
يا يطب للديل يا يطلع فوق مناكبها
تعاند اللي ركبها والغرور ساقه
وتصاحب اللي يلجمها بأخلاقه
والحر لجل الحقيقة يركب الأهوال !”
― فؤاد قاعود

“يازمن على راسه بطحة
بارزة ف قــرونك وواضحة
الخجل مـات والمفاضحة
ف الشيوخ قبل الشبـاب
ياحيتان بحـــر الممـــارسـة
ياسفن مش لاقية مرسى
البـــلابــل بـــايتـــة خــرسا
والخفـــافيش ف اصطخـاب
مثلوا روايــــة طـويلة
كلهـــا أوحـــال وبيلة
ثم جـاء ذكر الفضيلة
ف النهـــاية باقتضاب
واللى متحـامل لعلة
فعــل بقـــه ليس إلا
فعل شكمان التريللا
يرمى فوقك بالهبـاب
دنيا ســـرعتها مهــولة
قبل ما انعم بالطفــولة
ابتديت عهــــد الرجولة
ثم فاجأة الشعر شاب”
― فؤاد قاعود

“لما العيون طفحت دموع حمرا
طلع الكلام بركان غضب
إمسك ياواد مطرقتك السواد وهيج ف الكون
إلبس ياواد جلابيتك الزرقا
واعزق بفاسك ف الوشوش الإزاز
اشمر كمام عفريتك الغامقة
وانزل بمفتاحك على البتارين
حطم وجوه محبوكة التلوين بالمعاجين
وانطر شرر أحمر ياعرق الغضب
انطر شرر طاهر
دق اللهب ف الحطب
خلى النسيم يخلص من الجراثيم
قول ياجدع
وانزل بعزم الكلمة ع الضلمة
واخلق نهار بالأمر
خلى الحروف السودا تولد جمر
خلى الكلام كرابيج
تشق جلد التلمْ
وتشد ضهر العواجز
وتعلم الشاب الكتير الدهن
نط الحواجز
راح تعمل ايه والعقارب ف العفن بتعيش
راح تعمل ايه والغراب إتجوز البومة
وخلفوا خفافيش
قول كلمتك وامشى ولا تحكيش
ولا تقول تفاصيل ولا تهوَن
ولا تلتفت جبهتك عن وجهتك للشمس
دا كل شىء محسوب ومتدون
والمسألة منجلة
ح تحز وتقرّط
وتجز وتمرمط
وتعلم اللى استسهلوا الأقوال
إن الرجال أفعال .”
― فؤاد قاعود

“من بعد غزو مخلوقات غريبة للوطن
والسيطرة على الجهات الأربعة
قتلوا تلاتة من مثيرى الشغب
الحق والخير والجمال
شيعتهم ف صمت
ومكانش ف الجنازة إلا حافر القبور
وقلة من أراذل الحرس

إشتدت العماية والغواية عمت المكان
واتقدموا أفاضل الرجال بالاعتذار
واتأنبوا على سلوكهم النبيل
ومعتقل سياسى كتب عريضة استنكار
إتبرى فيها من جميع مايعتقد


لكل دا وماسبق وماسيأتى
أسلمت نفسى للخلا
مستنى طاقة قدر تنفتح لى
لو تنفتح لى رح ابتهل واقول
اجعلنى طائر
أبدل دراعاتى العقيمة أجنحة
أنهض وارفرف وارتفع عن الصغائر

رصدت ليلة القدر كلها
وعيونى مفتوحة على السما
أستنظر البشاير
واقدم الضراعة واطلب السماح
لحد لما شقشق الصباح
ولا ظهرش حل

لما اتنصب قصادى حائط اللاجدوى
حققت فيه لقيته مش سدد
مافيش حدود ولانهاية للعدد
وف آخر اللاحل تتوجد حلول
لكن حلول مضادة !
بالرغم من فداحة الخساير
مع اعترافى بالهزيمة المطلقة
لقيتنى أملك بعد كل دا
حرية إختيار محددة
على أن اختار مابين اتنين
أمارس اليوجا واتحول إلى تمثال
أو أنتظم درويش فى ساحة الحسين !”
― فؤاد قاعود