Peter Bek

“أيه الجديد ؟

الطير جناحه بيتربط لسه فى حديد

لسه العبيد عايشين عبيد بالاقتناع

كل اللى فاضل يعلنوها على المشاع

ان اللى خان كان مشترى

وان اللى مات هو اللى باع

بالذمة مين المستفيد

فرعون جديد

وللا اللى فات هو الملك

وللا احنا شعب بزمبلك

يؤمر نطيع

يشخط نبيع

معقول يكون لسه القطيع.. عايشين قطيع

وفرحانين بالمألسه والابلسه والملعنه

معقول تكون لسه الامانى

رغم اللى كان مش ممكنة ؟؟”
― محمد السيد, أبيض غامق

“قصاد نفسك
عيوبك كلها بتبان
عيونك شايفة كل مافيك بدون الوان
ولما الناس تكون شايفاك
بشكل مابتشوفوش جواك
هتعرف انهم عميان
محدش كان معاك غيرك
ودمعك جاي آخر اليوم
يبل مخدتك بهموم
يروح النوم
و مع نفسك تبات سهران
محدش كلمك عنك
وقالك كل شئ بوضوح
عشان الكل بيراعي
يكون شكل الكلام مسموح
واي صراحة مهما تكون
يا تتحامل يا بتجامل
شهادة بيبقي فيها جروح
قصاد نفسك تبان الصورة بالكامل
لحد الروح”
― محمد السيد

“اكتئب
اقعد لوحدك
اصنع العُزلة اللعينة
وإعمل البحر بدموعك
وإرمى قلبك فيه سفينة
وأمّا تبكى البحر يعلى
يرتجف قلبك يتوه
وقتها روحك هتصرخ
إلحقونى ياناس ياهوه
قلبى غرقااااان ...إلحقوه
بس مين ياخد بايدك
وانت مختار تكتئب وتكون لوحدك”
― محمد السيد

“مكنتش هسألك تاني
عشان عارفك بتدايق وتزعل من سؤالي عليه
لكنه واحشني هعمل ايه
هتعذرني وانا عارف
وتقعد جنبي ودموعك
هتاخد دمعتي وتنزل لآخر حتة في الاحزان
وتيجي عنينا علي صورته
بيضحك ضحكة الكسبان
سؤالي عليه ده كان حجة
عشان انا قلبي متطمن
وعارف انه دلوقتي في أعلي مكان
وانا مبسوط ومتطمن لأنه سعيد
وبتباهي قصاد الناس
بإني من صحاب ابنك
انا اقرب صحابي شهيد”
― محمد السيد