آيــات

“الأوّله… أرزاق ...
والتانيه…. أسماء...
والتالته…. بشتاق....
الأوّله… أرزاق مفيش حيلة ولا سكّة....
والتانيه…. أسماء عيال بتحب ع الدكّة....
والتالته… بشتاق لطعم الفرح والضحكة.....
الأوّله… أرزاق مفيش حيلة ولا سكّة غير المكتوب....
والتانيه…. أسماء عيال بتحب ع الدكّة و راسمة قلوب....
والتالته… بشتاق لطعم الفرح والضحكة يا شيخ أيوب ....
الأوّله… أرزاق مفيش حيلة ولا سكّة غير المكتوب مقّسِم كلّه بالحتة…
والتانيه…. أسماء عيال بتحب ع الدكّة و راسمة قلوب لكل الخلق إلا انت....
والتالته… بشتاق لطعم الفرح والضحكة يا شيخ أيوب أنا ملّيت ..حدوق امتي ؟....
الأوّله… أرزاق مفيش حيلة ولا سكّة غير المكتوب مقّسِم كلّه بالحتة وكله نصيب.....
متزعلشي…..
والتانيه…. أسماء عيال بتحب ع الدكّة و راسمة قلوب لكل الخلق إلا انت ملكش حبيب ...
متزعلشي….
والتالته… بشتاق لطعم الفرح والضحكة يا شيخ أيوب أنا ملّيت..حدوق امتي ؟ ف قاللي قريب ....
متزعلشي…..”
― مصطفى إبراهيم, ويسترن يونيون فرع الهرم

“كنت متعبة من كوني أنا
غير مسموح لي أن أكون أنا
ولا أستطيع إلا أن أكون أنا”
― بثينة العيسى, كبرت ونسيت أن أنسى

“كان نفسي مرة أتوه عن العنوان
و ابدأ في صفحة جديدة م الأول
معرفش ليه فرض الندم طَوّل
بكره اللي صوته في ودني مش سامعه
لسه الزمان واقف على النهايات
جوايا حاجة اتقسمت لحاجات
ولا حاجة منهم فيها بلة ريق
عطشان أوي مع أني مُت غريق
زعلان عشان عاجز أكون فرحان
و أنا اللي ناسي نعمة النسيان”
― محمد السيد, كسر عين

“كلها حاجات بسيطة

وأد إيه بتفرق معايا

أد إيه..

زي إيه..؟

زي لما الفرحة تيجي لوحدها

زي إحساس بالرضا

وزي ما حبك كده

وزي دمعة طيبة

أرتاح بعدها

وماعرفش ليه..

وزي إيه..

زي وردة ف عيد ميلادي

وزي يوم بسيط وعادي

عدي لكن مانستهوش..

وكلمة حلوة سمعتها

من قلب حد ماعرفهوش..

زي ما فضفض معاك

بكلمتين..

وف وسطهم أسرح

تقوللي روحت فين..

وزي إحساس بالأمان

لما ليلة أبات ف حضن

أصغر ولادي..

وزي غنوة من بعيد

فيها من ريحة بلادي

كلها حاجات بسيطة

وأد إيه بتفرق معايا..

أد إيه..”
― علي سلامة, محدش شاف وطن!