Nour

“بحاول ف حدود المتاح
بحاول أفهم
بحاول أحلم بـ اللي جي
و ساعات أقلب ف اللي فات
مفهمش
أنا كنت ميت و لا حي!
و ساعات كتير
و أنا ماشي ف شوارع الذكريات
أبص ع المكان وأضحك
و ساعات مابصش عشان مابكيش
لكن ببكي
ساعات بحب أحكي
ساعات مبتكلمش
و أبص لصورتك ف محفظتي و أقول
اللي خلقك خلق غيرك
هقطعها
و ساعات لساعات أبص ف عينك وأقول
ده غيرك انتِ ما في زي
و أحس إن أنا قاعد تحت شجرة ف الجنة
و أحس إن أنا ف النار
لكن الأصعب إني أحتار
و أكون ف النص
لا أنا عارف
طب أنا عاقل ولا مجنون
راجع ولا بتقدم
جاني ولا مجني عليه
عايز مين وعايز إيه؟
وليه دايما
برسم لوحتي و تعجبني
فأقوم دالق عليها الحبر!
عرفت كتير و فارقوني
لكن عمري ما أفارق حد
و أهزر كتير جدا
و مهزرش وقت الجد
ساعات أنام ثواني ف شهر
و ساعات أنام بالشهر
و العب مع نفسي كر و فر
و تكسبني و مكسبهاش!
و أرمي نفسي علي سريري
و نداهة ف تفكيري بتندهني
لكن مبندهاش!
فأنام و لو صحيت حي
بحاول ف حدود المتاح
و بحاول أفهم
و بحاول أحلم بـ اللي جي!”
― عبد الحميد عبد اللطيف, العد التنازلي للأيام

“الفرشة صباعك واللوحة إزاز
ارسم قلب وسهم واكتب حرف
اسند راسك واسرح وأما تخلص
شخبط ع الإزاز بالكف”
― عبد الحميد عبد اللطيف, العد التنازلي للأيام

“متقلش (ليه؟) لربنا!
متعترضش!
الإعتراض ظن منك
لشيء حصل غلط
والرؤية لجزء
مش واضح بالصورة
وإعتراضك ع الإله
أكبر غلط
مهما شافت العين
سبحانه خالق الصورة
والدنيا بالأصل إمتحان
ومدة من الزمان!
أيام كورق الأسئلة
وإجابتك
بسؤال
صح.. لكن الصياغة غلط
فسبحانه قال بالسورة
(أُجِيبُ دَعْوَةَ الدَّاعِ إِذَا دَعَانِ)
وأما تسأله المساعدة
تلقى الإجابة ف السؤال
وبالإيمان
سبحانه واضع الإمتحان
سامح إن تغش منه
ينجحك
حاول تغشه
يوقعك
حاول كمان
-ولإن كل شيء يسبح بحمده-
نفسك تبقى عدوك
وتمنعك
يبقى جرب لما السؤال يصعب
متقلش ليه.
جرب كمان
سبحان الله وبحمده
وكلمه
هو السميع
هيسمعك
ومتعترضش”
― عبد الحميد عبد اللطيف

“ليه يا دنيا
عايزة تلبسيني
الوش زي الناس
ليه يا دنيا
عشان أعيش
لازم أغش الناس
ما تخليكي ف حالك
وتسبيني
ليه عايزة بس
تغيريني
بتقولي عشان متغشش
وهو عشان متغشش
أغش الناس
وهو عشان متغشش
تقومي تغشيني
يا دنيا رافضك تغيريني
رافضك أموت وأنا عايش
رافضك تعيشيني
بتهدديني
لو ملعبتش بأسلوبك هتوريني
هددي ووريني
أنا وشي عاجبني
ولو حتي مش عاجب الناس
انتِ هي الوهم
والناس موهومة
وشيطانك يا دنيا خبيث
مخلي الناس مهمومة
أصل انتِ اصلا ولا حاجة
بجد ولا حاجة
ولو فكروا ثانية
هيلاقوا همهم
مهما كان
ولا حاجة
بس شيطانك
لاعب ف العقول
يا دنية الحاجة
وعشان انتِ مسمومة
بتسممي عقول الناس
هبستطلك الموضوع
اوعي تكوني فكرتي
إن وشوش الناس خدعاني
اوعي تكوني فكرتي بنخدع
ولو بينت كده
ما انتِ عارفاني
بعاند
وعِندي بارد
وعَندي اللي فاكر بيخدعني
بينخدع
يعني برضه بإختصار
انخدع
وأنا عارف إني بنخدع
أحسن ما انخدع
وفاكر إني بخدع
وأقلك حاجة
ميهمنيش الصنف ده من الناس”
― عبد الحميد عبد اللطيف, عصافير الجنة