Ahmed Alaa

“في حاجات لازم... علشان نعرف....درجة قوتها...بنكسرها

وحاجات ف ادينا... عشان نعرف.... اننا عايزينها ....بنخسرها

كدّبت ف عمرك كام صاحب

علشان كان نفسك تتطمن ؟

وخسرت اصحابك واتطمنت

طب كام بالون فرقعوا منك

وإنتا بتنفخهم ع الاخر؟

وعرفت اخرهم بس ندمت

دلوقتي فهمت

أنا عاوز إيه

ونا كنت بفرقع بلالين ليه

أنا عاوز حاجه بدون آخر

أو حتى بآخر ما اوصلّوش

كام حيطه ف ضهري

اضرب واهري

ف بدنهم بس ما يتهدوش

شيء مش مغشوش

مضمون دايما

من غير ما احتاج إني اتأكد

أو حتي اخاف إني اتنكد

لا يكون ف الاخر برضه فاشوش

يا بشر عرفاني وعارفه أنا مين

بلغوا اسفي لكل البلالين

كلنا كنا ف يوم بالونه

فقعتنا تجارب بني أدمين

بلالين عايشين نفسها تلقي

حد يصدق ويقدرها

متأكد من إنه عاوزها

من غير مايجرب يخسرها”
― مصطفى إبراهيم, ويسترن يونيون فرع الهرم

“لما قلتوا الدنيا فانية و قلت ايوة
فزتوا انى امنت بيكو
و فاتكوا انى بعد فترة
هبقى زاهد
حتى فيكو”
― مصطفى إبراهيم, ويسترن يونيون فرع الهرم

“بدون سبب واضح

بدون م أعرف سبب واضح
عشان أزعل
أنا زعلان
و فجأة بدون سبب برضه
يفرحنى
بكون فرحان
لا منى عرفت أعمل إيه
عشان مزعلش من تانى
و لا منى
عرفت إزاى
أدوق الفرحة بالمجان”
― مصطفى إبراهيم, ويسترن يونيون فرع الهرم

“البـراح مجروح بشقفة قزاز
لو تشوفها الشمس تتزلزل
انتباه ان كنت بتمثل
انتباه ان كنت بتغني
انتباه ان كنت شاعر عويل
الفرح والكدب حبله قصير
والعذاب والصدق حبله طويل
نمرة الدبابة راح تتغير
الحجر مش راضي بالتدويل”
― فؤاد حداد, أيام العجب والموت